O alumnado do 5º curso da Escola de Arquitectura da Universidade de Navarra visita hoxe Muimenta da mano da Fundación RIA, para desenvolver un proxecto académico de reactivación e rehabilitación na aldea do municipio ourensán de Carballeda de Avia.
Desde o departamento de Proxectos Arquitectónicos da UNAV e co profesor invitado Fermín Vázquez (b720/ Fermín Vázquez Arquitectos) e co profesor José Ángel Medina Murua, o alumnado desenvolverá o proxecto de tres edificacións en tres parcelas independentes con usos de vivenda, instalacións para uso produtivo, equipamento e espazo público. O traballo desenvolverase ao longo do primeiro semestre deste curso e finalizará cunha exposición dos traballos.
O ámbito do proyecto desenvolverase en Muimenta, un dos 21 núcleos rurais integrados na estratexia Aldeas Modelo e na que a Fundación RIA participa levando a cabo o plan de dinamización. Este instrumento está impulsado pola Xunta de Galicia baixo a Lei de recuperación da terra agraria (2021) para ensaiar, a través de estratexias e proxectos piloto, diferentes metodoloxías que permitan vislumbrar un cambio de tendencia positivo nas dinámicas que afectan ao rural galego e de moitas outras rexións europeas.
Atendendo aos grandes retos de sustentabilidade, tanto medioambiental, económica e social, que afronta a nosa sociedade no contexto europeo, o programa académico toma como ámbito de traballo o rural de Galicia para abordar as súas problemáticas de forma integral. Son temáticas transversais ao exercicio a despoboación, a xestión do patrimonio construído, as oportunidades económicas, a produción agroforestal de orixe local, a perda de biodiversidade, a xestión forestal sustentable, os incendios forestais, o abandono da terra produtiva, a xestión do ciclo da auga, a sustentabilidade enerxética, etc.
