O proxecto responde a dous obxectivos principais: posicionar Lourizán como referente no sector forestal a nivel nacional e europeo; e abrir a finca e as súas actividades ao público e á sociedade en xeral. Neste proceso, a Fundación RIA traballou –en colaboración coa Consellería de Medio Rural, a través de AGACAL e XERA– no deseño dun programa funcional que sitúe Lourizán e o sector forestal no centro da innovación, desenvolvemento e protección do medio natural.
O nome de Lourizán está indiscutiblemente ligado á historia da investigación e xestión forestal en España, así como á figura de Eugenio Montero Ríos. Ademais de albergar elementos materiais de gran interese patrimonial –como o propio pazo, pero tamén o invernadoiro de cristal, o xardín botánico e o arboretum–, tamén posúe un gran valor cultural inmaterial. Exemplo diso son as negociacións para a rendición española na guerra de Cuba, nas que Montero Ríos mediou desde Lourizán.
O estado de deterioro do edificio do Pazo e do invernadoiro, ambos os dous bens de interese cultural, demandan unha intervención inmediata. Este feito aprovéitase como unha oportunidade para renovar outras partes da finca e converter Lourizán nun lugar de encontro e difusión do sector forestal, así como nun espazo recreativo e de aprendizaxe accesible á cidadanía.
Tendo isto en consideración, o equipo da fundación realizou unha análise das infraestruturas, usos do solo e actividades actuais da finca, tomando como punto de partida a información dispoñible e complementándoa con entrevistas ao persoal do complexo e en mesas de debate co sector empresarial e a administración. Desta análise despréndese un diagnóstico de necesidades, así como de oportunidades, que serve para elaborar un marco estratéxico e definir as actividades que conforman dita estratexia.
Finalmente, deséñase un concurso de arquitectura adecuado ao ámbito do proxecto, elaborando bases técnicas completas e dirixido ao obxectivo do proxecto. Este concurso lanzarase antes de finais de ano, a través dun proceso que aspira a potenciar unha cultura do deseño e fomentar procesos de contratación pública exemplares.
